Overgeared - Chapter 147

အပိုင်း(၁၄၇) { စာစဉ် ၁၀ - အပိုင်း(၁၂)}

‘ငါ လုပ်နိုင်ပြီကွ’

ဂရစ်ခ် အောင်မြင်သွားခဲ့သည်။ ယခင်က သူ ခံစားခဲ့ဖူးသည့် ပျော်ရွှင်မှုများထက် သာလွန်သော ပျော်ရွှင်မှုကို သူ ယခု ခံစားနေရပါသည်။

ဒဏ္ဍာရီအဆင့်အိုင်တမ်များအားလုံးက ပြုလုပ်ရ အတော်ခက်သည်။ ထွက်ရပ်ပေါက်ဓား၊ မြင့်မြတ်သန့်စင်ဒိုင်းနှင့် နက်ရှိုင်းသော မကျေနပ်မှု၏ သောန်းတို့သည် သိသိသာသာကို ကောင်းမွန်သော ပစ္စည်းများဖြစ်ကြသော်လည်း အကောင်းဆုံးဟုတော့ မဆိုထိုက်ပါ။ သူတို့က အယ်လ်ဘာတီနိုပြုလုပ်ခဲ့သော ပြိုင်ဘက်ကင်းအဆင့်သာ ရှိတဲ့ ဒိန်းစလိတ်ကို ယှဉ်ပင် မယှဉ်နိုင်ကြ။

သို့သော် ကျရှုံးသည်တော့ ခြားနားသည်။ ဂရစ်ခ်ကိုယ်တိုင် ဖန်တီးခဲ့သည့် လက်နက်ဖြစ်သဖြင့် ငြင်းဆိုရမရနိုင်လောက်အောင် သာလွန်ကောင်းမွန်သည့် လက်နက်ဖြစ်သည်။ ဒိန်းစလိတ်ကော.....။ ဒိန်းစလိတ်က ခွေးသာသာဘဲ ရှိပါတော့သည်။

“မတူတော့ဘူး” ဂရစ်ခ် ယုံကြည်ချက်ရှိနေသည်။ “အခု ငါကသာ အကောင်းဆုံးဘဲ”

သူ့တွင် အသန်မာဆုံးချပ်ဝတ်အစုံလိုက်ရှိနေပြီး ယခုဆိုပါက အသန်မာဆုံးလက်နက်ကိုပါ ကိုင်ထားသည်။ သူ့ကို မည်သူက ယှဉ်နိုင်တော့မည်နည်း။

‘ဘယ်လိုတောင်လဲ... ဘယ်သူကများ ပါရမီမရှိ အရည်အချင်းမရှိတဲ့ ဂိမ်းကစားသူတစ်ယောက်က ဒီလိုမျိုးနေ့ကို ရောက်လာလိမ့်မယ်လို့ စိတ်ကူးမိမှာလဲ’

သူသည် လူသစ်ဖြစ်နေပြီ။ ပက်မာ၏ ဆက်ခံသူမဖြစ်ခင်က တစ်နှစ်တာလုံး အပြင်းအထန်ကြိုးစားခဲ့လျှင်တောင် အဆင့် ၈၀ ကိုသာ ရောက်နိုင်ခဲ့သည်။

“နောက်ဆုံးတော့...”

လက်သီးဆုပ်လိုက်....။ ဂရစ်ခ်က လက်သီးနှစ်ခုလုံးကို အပေါ်သို့ မြှောက်လိုက်သည်။ သူ ဖိနှိပ်ထားရသော ခံစားချက်များအားလုံးက အော်သံအဖြစ် ပေါ်ထွက်လာပါတော့သည်။

“ငါကသာ အောင်နိုင်သူဘဲ”

ထိပ်တန်းအဆင့်ရှိကစားသမား...။ ဂိမ်းပါရမီရှင်တွေ...။ သူတို့လား...။ ငါ့အိုင်တမ်တွေရဲ့ စွမ်းအားရှေ့မှာ သူတို့အားလုံးကူကယ်ရာမဲ့နေကြမယ်....။

“ဟက်ဟက်ဟက်ဟက်။ ငါ့အဆင့်တွေ တက်နေတာ အရမ်းမြန်မနေဘူးလား။ စနစ်တောင် အိုင်တမ်တွေလောက် မကောင်းဘူး။ ဘူး... ဟက်ဟက်ဟက်”

ဂရစ်ခ်သည် ဘာကြောင့်ရယ်နေမှန်း အဆင့်ရှိကစားသမားများသာ သိရှိသွားပါက ကြိုးစားပမ်းစား အမဲလိုက်ကာ အဆင့်တင်နေရသော အဆင့်ရှိကစားသမားများအနေဖြင့် ဒေါသထွက်သွားကြမည် ဖြစ်သည်။

“သွေးစုန်းမယူရာရေ... ငါတို့ နောက်တစ်ခါ ထပ်တွေ့ရင်တော့ အရင်တကြိမ်နဲ့ တူမှာ မဟုတ်တော့ဘူးနော်။ အခု ငါက သူ့ထက် သာလွန်သွားပြီ မဟုတ်လား။ ဟက်ဟက်ဟက်။ ခွီး... ခွီး.... ဟမ်”

ဂရစ်ခ် အရူးတစ်ယောက်ကဲ့သို့ ရယ်နေစဉ် သူ့ရှေ့၌ အသိပေးစာတစ်ခု ပေါ်လာလေသည်။

[သင်သည် ဒဏ္ဍာရီလာအိုင်တမ်ငါးခုကို ပြုလုပ်လိုက်ခြင်းဖြင့် သင့်အလားအလာကို သက်သေပြလိုက်ပြီးပါပြီ။]

‘ဒါက..’

ဒဏ္ဍာရီလာပန်းပဲဆရာ၏ လက်မှုအတတ်ပညာကို ရှင်းလင်းချက်တွင်တော့ ဒဏ္ဍာရီအဆင့်သတ်မှတ်ချက် အိုင်တမ်ငါးခုကို ပြုလုပ်ပြီးပါက အထူးတစ်စုံတစ်ရာဖြစ်လာမည်ဟု ပြောထားတာ ရှိပါသည်။ ဂရစ်ခ်ရှေ့ရှိ အသိပေးစာက ထပ်မံပြောင်းလဲသွားသည်။

[သင် လုံလုံလောက်လောက် တိုးတက်လာပါပြီ။ သင်သည် နာမည်မရှိပန်းပဲဆရာမဟုတ်တော့ပါ။]

[အနာဂတ်တွင် သင် ပြုလုပ်သည့် အိုင်တမ်များအားလုံးတွင် သင့်နာမည်အစအက္ခရာ ‘G’ ကို ရေးထိုးသွားပါမည်။]

[ထို ‘G’ ကြောင့် တကမ္ဘာလုံးသည် ပက်မာ၏ ဆက်ခံသူဟာ မွေးဖွားလာပြီဖြစ်ကြောင်း သိရှိသွားကြမည် ဖြစ်ပါသည်။]

[သင့်အလားအလာသည် ပွင့်လန်းသော အခြေအနေသို့ ရောက်ရှိနေသည်။] 

[အိုင်တမ်ကို အသုံးပြုရန် လိုအပ်ချက်နှင့် မကိုက်ညီသောအခါ ခံရမည့် ပြစ်ဒဏ်ကို အဆင့်သတ်မှတ်ချက်ကိုလိုက်၍ 15% လျှော့ပေးလိုက်ပါသည်။]

[အိုင်တမ်အသုံးပြုရန် လိုအပ်ချက်နှင့် မကိုက်ညီသောအခါ ထိုအိုင်တမ်၏ စွမ်းရည် 50% ကို အသုံးပြုခွင့်မရသည့် ပြစ်ဒဏ်ကို ပယ်ဖျက်လိုက်သည်။]

[အိုင်တမ်အပေါ် နားလည်သည့် အမြန်နှုန်းသည် ယခင်ကထက် နှစ်ဆပိုမိုမြန်ဆန်လာမည်။]

အရမ်းကောင်းတယ်။ အိုင်တမ်များ၏ လိုအပ်ချက်နှင့် မကိုက်ညီသောအခါ ခံရသည့် ပြစ်ဒဏ်က အတော်ကလေးလျော့သွားသဖြင့် ဂရစ်ခ် အတော်ကို ပျော်သွားပါသည်။ ပျော်ရွှင်မှုက သူ့နှလုံးကို တိုက်ခိုက်နေသကဲ့သို့ ခံစားနေရသည်။ သို့သော်...

[ပွင့်လန်းလာသော သင့်အလားအလာကြောင့် သင့်တိုးတက်မှုသည် ယိုယွင်းလာသည်။]

[အိုင်တမ်များ ပြုလုပ်သည့်အခါ ရရှိသည့် အညွှန်းကိန်းပွိုင့်ပမာဏသည် ကျဆင်းသွားပါသည်။]

[အနာဂတ်တွင် ရှားပါးအဆင့်သတ်မှတ်ချက်အိုင်တမ်များ ပြုလုပ်သည့်အခါ သင်သည် မည်သည့်အညွှန်းကိန်းပွိုင့်ကိုမှ ရရှိနိုင်တော့မည် မဟုတ်ပါ။]

[အနာဂတ်တွင် မော်ကွန်းအဆင့်သတ်မှတ်ချက်အိုင်တမ်များ ပြုလုပ်သည့်အခါ သင်သည် မည်သည့်အညွှန်းကိန်းပွိုင့်ကိုမှ ရရှိနိုင်တော့မည် မဟုတ်ပါ။]

[ပြိုင်ဘက်ကင်းအဆင့်သတ်မှတ်ချက်အိုင်တမ်များ ထုတ်လုပ်သည့်အခါ အညွှန်းကိန်းအားလုံးသည် +4(အမြဲတမ်း) တက်လာပါမည်။]

[ဒဏ္ဍာရီအဆင့်သတ်မှတ်ချက်အိုင်တမ်များ ထုတ်လုပ်သည့်အခါ အညွှန်းကိန်းအားလုံးသည် +10(အမြဲတမ်း) တက်လာပါမည်။]

"..."

ယခုအချိန်အထိ ဂရစ်ခ်သည် ရှားပါးအဆင့်အိုင်တမ်ကို ပြုလုပ်နိုင်တိုင်း အညွှန်းကိန်းအားလုံးက +2၊ မော်ကွန်းအဆင့်အိုင်တမ် ပြုလုပ်နိုင်တိုင်း အညွှန်းကိန်းအားလုံးက +4၊ ပြိုင်ဘက်ကင်းအဆင့်အိုင်တမ် ပြုလုပ်နိုင်တိုင်း အညွှန်းကိန်းအားလုံးက +12 နှင့် ဒဏ္ဍာရီအဆင့်အိုင်တမ်ကို ပြုလုပ်နိုင်တိုင်း အညွှန်းကိန်းအားလုံးက +25 ဆုရရှိသည်။ သို့သော် အဘယ်ကြောင့်နည်း။ သူ့အလားအလာက ပွင့်လန်းလာသောကြောင့်(ဂရစ်ခ်ကတော့ ကုန်ခမ်းသွားသည်ဟု ဖတ်မိနေပါပြီ) အိုင်တမ်များ ပြုလုပ်ရမှ ရရှိသည့် အညွှန်းကိန်းပွိုင့်များက သိသိသာသာ ကျဆင်းသွားပြီ။

“သေစမ်း..”

ရေရှည်အတွက် နစ်နာသွားပါပြီ။ နစ်နာရုံသာမဟုတ် ပျက်စီးသွားခြင်း ဖြစ်သည်။

“အား.... သည်သောက်အော်ပရေတာကတော့”

ဒဏ္ဍာရီအဆင့် Class ကို သူတို့ ဒီလောက်တောင် နှိပ်ကွပ်နေတာလား။ ၎င်းမှာ ဂိမ်းဟန်ချက်ကို ထိန်းညှိခြင်းဖြစ်ပါသော်လည်း ဂရစ်ခ်အတွက်တော့ ကူကယ်ရာမရတော့ပါ။ သည်အတောအတွင်း အသိပေးစာအသစ်များ ဆက်လက်ဖြစ်ပေါ်နေသည်။

[ပက်မာ၏ ဆက်ခံသူ Class အကြောင်း ကမ္ဘာကြီးအား ဖွင့်ချပါတော့မည်။ သင်သည် အဆင့်သတ်မှတ်ချက်တွင် စာရင်းသွင်းပြီး သင်ဟာ ပက်မာ၏ ဆက်ခံသူဖြစ်ကြောင်း ကြေဌာလိုပါသလား။]

အတိတ်တွင်တော့ ဂရစ်ခ်က Yes ကို နှိပ်ခဲ့မိမည်။ အကြောင်းမှာ သူက ဆယ်လီဖြစ်ချင်သည် မဟုတ်ပါလား။ သို့သော် ယခုတော့ ခြားနားသွားချေပြီ။

“ငါ မလုပ်ချင်ဘူး”

ဂျီရှုကအပါအဝင် စက်ဒခအစည်းအရုံးထဲရှိ ကျော်ကြားသည့် လူများသည် သူတို့ဘယ်သွားသွား လူအုပ်ကြီး၏ ဒဏ်ကို ခံနေရသည်။ ထိုအခြင်းအရာကို ဂရစ်ခ်က မျက်မြင်တွေ့ရှိပြီးဖြစ်၍ ယခုဆို ဆယ်လီဖြစ်ချင်သည့် ဆန္ဒမရှိတော့ပါ။

‘ပြီးတော့ အိုင်တမ်တွေ လုပ်ပြီး ပိုက်ဆံရှာတာက ရုပ်သံတွေကပေးမဲ့ အခကြေးငွေထက် ပိုအကျိုးအမြတ်ရနေတာဘဲလေ’

[အဆင့်သတ်မှတ်ချက်တွင် သင် စာရင်းမသွင်းတော့ပါ။]

[ဒဏ္ဍာရီလာပန်းပဲဆရာ၏ လက်မှုအတတ်ပညာစကေး၏ အချက်အလက်များ မွမ်းမံပြီးသွားပါပြီ။]

[(နတ်ဘုရားလက်နက်သက်သေ) ဒဏ္ဍာရီလာပန်းပဲဆရာ၏ လက်မှုအတတ်ပညာစကေး]

Lv.3 (87.1%)

မည်သို့ပြုလုပ်ရမည်ကို သင်သိပါက ထိုကိရိယာအိုင်တမ်များကို သင် ထုတ်လုပ်နိုင်ပါသည်။

‘ဒဏ္ဍာရီလာပန်းပဲဆရာ၏ ဖန်တီးခြင်း’ စကေးဖြင့် အိုင်တမ်အသစ်အတွက် ထုတ်လုပ်နည်းလမ်းများကို သင် ဖန်တီးနိုင်ပါသည်။

သင်သည် စိတ်ကူးယဉ်(myth) အဆင့်အိုင်တမ်များကို ထုတ်လုပ်နိုင်ပါပြီ။

ရှားပါး~မော်ကွန်း အဆင့်သတ်မှတ်ချက်အိုင်တမ်များကို ထုတ်လုပ်နိုင်ရန် မြင့်မားသော ဖြစ်နိုင်ခြေ ရှိပါသည်။

ပြိုင်ဘက်ကင်း အဆင့်သတ်မှတ်ချက်အိုင်တမ်များကို ထုတ်လုပ်နိုင်ရန် သေချာသော ဖြစ်နိုင်ခြေ ရှိပါသည်။

ဒဏ္ဍာရီ အဆင့်သတ်မှတ်ချက်အိုင်တမ်များကို ထုတ်လုပ်နိုင်ရန် ရှားပါးသော ဖြစ်နိုင်ခြေ ရှိပါသည်။

စိတ်ကူးယဉ် အဆင့်သတ်မှတ်ချက်အိုင်တမ်များကို ထုတ်လုပ်နိုင်ရန် အလွန်ရှားပါးသော ဖြစ်နိုင်ခြေ ရှိပါသည်။

* ထုတ်လုပ်ထားသည့် အိုင်တမ်များ၏ အညွှန်းကိန်းများအားလုံး 17% တိုးလာပါမည်။

* ပြိုင်ဘက်ကင်းအဆင့်အိုင်တမ်များ ထုတ်လုပ်လိုက်ပါက အညွှန်းကိန်းများအားလုံး +4(အမြဲတမ်း) တက်လာမည်ဖြစ်ပြီး တိုက်ကြီးတစ်ခုလုံးတွင် ဂုဏ်သတင်းသည် +150 တက်လာပါမည်။

* ဒဏ္ဍာရီအဆင့်အိုင်တမ်များ ထုတ်လုပ်လိုက်ပါက အညွှန်းကိန်းများအားလုံး +10(အမြဲတမ်း) တက်လာမည်ဖြစ်ပြီး တိုက်ကြီးတစ်ခုလုံးတွင် ဂုဏ်သတင်းသည် +500 တက်လာပါမည်။

* စိတ်ကူးယဉ်အဆင့်အိုင်တမ်များ ထုတ်လုပ်လိုက်ပါက တိုက်ကြီးတစ်ခုလုံးတွင် ဂုဏ်သတင်းသည် +1,000 တက်လာပါမည်။

* ဒဏ္ဍာရီအဆင့်အိုင်တမ်ငါးခု ဖန်တီးပြီးတိုင်း ထူးခြားသော တစ်စုံတစ်ခု ဖြစ်ပေါ်လာမည်။ (လက်ရှိ 5/10)

“တကယ်ကြီးဘဲ... ဟာသလုပ်နေတာ မဟုတ်ဘူးဟ”

စကေးရဲ့ ဖော်ပြချက်တွေက အရင်ဟာနဲ့ဆို ယှဉ်လို့ကို မရတော့ဘူး။ သူ ဒဏ္ဍာရီအဆင့်အိုင်တမ်ငါးခု ပြုလုပ်ပြီးတိုင်း အထူးသက်ရောက်မှုများ ဖြစ်ပေါ်လာမည်ကို ဂရစ်ခ် သတိထားမိလိုက်သည်။

“ဒဏ္ဍာရီအဆင့် အိုင်တမ်တွေလား။ ငါ သူတို့ကို လုပ်နိုင်မှာ မဟုတ်ဘူး”

အထူးဖြစ်ရပ်များက ဟန်ချက်ညီမှုကို ထိန်းပေးနေပုံ ရသည်။

‘သိပ်ပြီးတော့ ညစ်ပတ်ထားတာလဲ မဟုတ်တော့ပါဘူး’

ပြစ်ဒဏ်ခံရသည်ကိုလဲ လျှော့ပေးထားသည်။ နောက်တစ်ခါသက်ရောက်မှုဆိုပါက သည်ထက်ပင် ကောင်းလာမည့်ပုံ ရသည်။ သူ အကောင်းဘက်မှ ကြိုးစားတွေးနေစဉ် နောက်ဆုံးအသိပေးစာများ ပေါ်လာလေသည်။

[တိုက်ကြီးတစ်ခုလုံးတွင် သင့်လက်ရှိဂုဏ်သတင်းသည် 11,830 ရှိနေပါသည်။ သင့်ဂုဏ်သတင်း 30,000 ကျော်သွားပါက သင်သည် ဂုဏ်သတင်းစတိုးကို အသုံးပြုနိုင်တော့မည် ဖြစ်သည်။] 

[ဂုဏ်သတင်းစတိုး]

ကစားသမားအားလုံးအတွက် အထူးစတိုးဖြစ်သည်။ ဂုဏ်သတင်းဖြင့် ပစ္စည်းများကို ရယူနိုင်သည်။

ရှားပါးသော ပစ္စည်းကောင်းများ အများကြီးရှိပါသဖြင့် သေချာအသုံးပြုပါ။

စတိုး၏ တည်နေရာက အခါအားလျော်စွာ ပြောင်းလဲနေပါမည်။

အိုင်တမ်ပြုလုပ်ခြင်းမှ ရရှိနိုင်သည့် ဂုဏ်သတင်းပွိုင့်ပမာဏကျသွားချိန်မှ ဂုဏ်သတင်းစတိုးအကြောင်း စနစ်မှ လာသတင်းပေးနေသည်။ အနာကို ဆားလာပက်နေသည် မဟုတ်ပါလား။ စနစ်က လူကို ဟာသလုပ်ရသည်ကို ကြိုက်နေသည်လော။

ဂရစ်ခ် မျက်နှာကြီးနီရဲလာသည်။ “သည်အော်ပရေတာတွေက @$&*(!~$#@#!!~@*!”

"..."

အသန်မာဆုံးအိုင်တမ်ကို ပြုလုပ်ပြီးနောက်တွင်....

ခမ်က ပျော်နေပြီးနောက် ဒေါသထွက်သွားကာ အော်ဟစ်နေပြန်သည့် ဂရစ်ခ်ကို ကြည့်နေ၏။

‘ဂရစ်ခ်ရဲ့ ဒီလိုပုံစံကိုတောင် မတွေ့ရတာ ကြာနေပြီဘဲ’

***

S.A. ဂရု၏ ရုံးချုပ်တွင်..

ယွန်းနာဟီးနှင့် သူ(မ)၏ အဖွဲ့သားများက မော်နီတာကို ကြည့်နေကြသည်။ ဂရစ်ခ်က ဒဏ္ဍာရီအဆင့်သတ်မှတ်ချက်ရှိသော ကျရှုံးကို ဖန်တီးလိုက်နိုင်သည့် အခိုက်အတန့်ကို သူတို့ကြည့်နေကြခြင်း ဖြစ်လေသည်။ အဖွဲ့သားများအားလုံး လေးစားသံများဖြင့် ပွက်ပွက်ညံသွားကြသည်။

“တကယ်ကို အံ့ဩစရာဘဲ။ ဒဏ္ဍာရီအဆင့်အိုင်တမ်တစ်ခုက ဒီလိုမျိုး ပေါ်လာတာလား”

“ဒီကောင် ပုံမှန်ဆို ပုံမှန်အဆင့်နဲ့ ရှားပါးအဆင့်တွေဘဲ လုပ်နိုင်နေတာကို။ ဒါ သူ ကံကောင်းနေတာ မဟုတ်ဘူး။ ပွင့်တာ နောက်ကျနေတာ။ ခစ်ခစ်ခစ်..”

ယွန်းဆန်းမင်က ထောင့်မှ စကားပြောလိုက်သည်။ “အခု သူက အသန်မာဆုံးဒဏ္ဍာရီအဆင့်အိုင်တမ်ကို ပိုင်ဆိုင်သွားပြီ။ မျှခြေက မြန်မြန်ဆန်ဆန်ကို ပျက်ဆီးသွားတော့မယ်”

အဖွဲ့ခေါင်းဆောင်ယွန်းနာဟီးက သူ(မ)၏ ခေါင်းကို ခါယမ်းလိုက်သည်။ “မဟုတ်ဘူး။ မျှခြေကို ပြန်ထိန်းပေးလိုက်မယ်”

မော်နီတာက ဂရစ်ခ်၏ အမြင်အဖြစ်သို့ ပြောင်းသွားသည်။ သူတို့က မွမ်းမံထားသည့် အသိပေးစာအသစ်များကို မြင်လိုက်ရ၏။

“အခုဆို အိုင်တမ်တွေ လုပ်တဲ့အခါ ရတဲ့ အညွှန်းကိန်းတွေ ဂုဏ်သတင်းပွိုင့်တွေ ကျသွားပြီ။ ဒါဖြစ်သွားတာ အရမ်းနောက်ကျလွန်းတယ်” ယွန်းဆန်းမင်က ဂရစ်ခ်ကို လှောင်ပြောင်နေသည်လားမသိ။

အသင်းသားများ အံ့ဩနေကြသည်။

“မင်း မသိဘူးလား။ Satisfy ရဲ့ စနစ်က သတ်မှတ်ပြီးသား။ အဖြစ်အပျက်အသစ်တွေသာ ဖြစ်မလာရင် မူရင်းစနစ်ကနေ သွေဖယ်မသွားဘူး”

“ဒါဆို ဒါက အရင်ကတည်းက အချိန်နဲ့ သတ်မှတ်ပေးထားတဲ့ ဟာပေါ့”

ယွန်းနာဟီး ခေါင်းညိတ်လိုက်သည်။ “ဟုတ်တယ်။ ပက်မာရဲ့ ဆက်ခံသူက သန့်စင်တဲ့ တိုက်ခိုက်ရေးအမျိုးအစားအစစ်မဟုတ်ဘူးလေ။ တခြားဒဏ္ဍာရီ Class တွေနဲ့ဆို တိုက်ခိုက်စွမ်းရည်အရမ်းနိမ့်ပေမဲ့ ဒီလို အညွှန်းကိန်းတွေ တက်စေတဲ့ သက်ရောက်မှုကို အကန့်အသတ်မရှိ ရနိုင်တာ မဟုတ်ဘူး။ လက်ရှိအခြေအနေအရ သူ့ရဲ့ တိုက်ခိုက်စွမ်းရည်က တခြားဒဏ္ဍာရီ Class တွေနဲ့ ယှဉ်လိုက်ရင် သာလွန်လိမ့်မယ်လို့ ငါ မထင်ဘူး”

ပြဿနာမှာ ဂရစ်ခ်က ကံမကောင်းသည့် ကောင်ဖြစ်သည်။ စူပါကွန်ပျူတာမော်ဖီးရပ်စ် ခန့်မှန်းထားသည်က ပက်မာ၏ ဆက်ခံသူသည် Class ရရှိပြီး သုံးလအတွင်း ဒဏ္ဍာရီအဆင့်အိုင်တမ်ငါးခုကို ပြုလုပ်နိုင်သင့်သည်။ ထိုမျှ အညွှန်းကိန်းတက်စေခြင်း သက်ရောက်မှု မရသင့်ပေ။

သို့သော် ဂရစ်ခ်က ကံမကောင်းလွန်းသဖြင့် ဒဏ္ဍာရီအဆင့်အိုင်တမ်များကို မပြုလုပ်နိုင်ချေ။ သူ မည်မျှပင် ကြိုးစားစေကာမူ အဆင့်နိမ့်အိုင်တမ်များကိုသာ ပြုလုပ်နိုင်နေသည်။ ထို့ကြောင့် ဤသက်ရောက်မှုကို အချိန်အတော်ကြာရရှိခဲ့ကာ မကောင်းသည့် ကံသည် ကံကောင်းခြင်းအဖြစ်သို့ ပြောင်းသွားခဲ့ပုံရသည်။ 

“သူက ကံကောင်းတာလား.. ဆိုးတာလားဆိုတာကို ငါလဲ မသိတော့ဘူး...”

ထိုအချိန် တကမ္ဘာလုံး တုန်လှုပ်နေကြသည်။ Satisfy တွင် ဆော့ကစားနေသည့် ကစားသမားအားလုံးက တစ်ချိန်တည်းတွင် တုန်လှုပ်စရာအသိပေးစာတစ်ခုကို လက်ခံရရှိလိုက်သောကြောင့် ဖြစ်သည်။

[ပက်မာ၏ နည်းစနစ်များနှင့် စိတ်ဆန္ဒကို ဆက်ခံသော ဆက်ခံသူတစ်ယောက် ပေါ်ထွက်လာပြီ။ သူသည်သာ သည်ကမ္ဘာတစ်ခုလုံးတွင် ဒဏ္ဍာရီအဆင့်အိုင်တမ်များကို ထုတ်လုပ်နိုင်မည်။]

ကြားဖြတ်သတင်းများ၊ ကြားဖြတ်သတင်းများ၊ ကြားဖြတ်သတင်း။ ကြားဖြတ်သတင်းများ အထပ်ထပ် ဖြစ်ပေါ်နေသည်။ နိုင်ငံအသီးသီးရှိ မီဒီယာများ ပွက်လောရိုက်နေကြပြီ။

[ပက်မာက ဘယ်သူကြီးလဲ]

[ပက်မာဆိုတာက ဒဏ္ဍာရီလာပန်းပဲဆရာဖြစ်သလို ဓားကိုလဲ ကျွမ်းကျင်သူဘဲ]

[ပက်မာရဲ့ ဆက်ခံသူဆိုတာက ဒဏ္ဍာရီအဆင့် Class လား]

[‘ဒဏ္ဍာရီ’ဆိုတဲ့ စကားလုံးပါတာမို့ ဒဏ္ဍာရီအဆင့်လို့ ခန့်မှန်းထားပါတယ်]

[ဒဏ္ဍာရီအိုင်တမ်တွေကို လုပ်ပေးနိုင်တဲ့ တစ်ဦးတည်းသောလူ]

[ကစားသမားနှစ်ဘီလီယံထဲကနေ ဒဏ္ဍာရီ Class ရတဲ့ ကစားသမား ပေါ်လာပြီ]

[(Column) ဒဏ္ဍာရီ Class တစ်ခုမှာ စွမ်းအားဘယ်လောက်လောက် ရှိမလဲ]

[ပန်းပဲဆရာအဆင့်သတ်မှတ်ချက်တွင် နံပါတ်တစ်ဖြစ်သူ ပန်မီယာ ‘ငါက ပက်မာရဲ့ ဆက်ခံသူ မဟုတ်ဘူး’]

[ထိပ်တန်းအစည်းအရုံးတွေက ပက်မာရဲ့ ဆက်ခံသူကို အသေအလဲ ရှာနေကြပြီ...]

[အထူးဂျယ်ဖာမြှားတွေကို ဖန်တီးခဲ့သူက ပက်မာရဲ့ ဆက်ခံသူ ဖြစ်နိုင်လား..]

[တတိယမြောက်မော်ကွန်း Class ကို ပိုင်ဆိုင်သူ ကတ်စ် ‘ပက်မာရဲ့ ဆက်ခံသူလား။ အက်တာက ပန်းပဲဆရာသာသာပါဘဲ။ သွေးစစ်သည်တော်ရှေ့မှာ ဘာမှမဟုတ်ဘူး။ မင်းကို ငါ့ရဲ့ ကိုယ်ပိုင်ပန်းပဲဆရာဖြစ်လာဖို့ ပိုက်ဆံအလုံအလာက်ပေးမယ်။ ငါ့အပိုင်ဖြစ်လာလိုက်’ ကတ်စ်၏ မာနကြီးသော ကောမန့်]

ထိတ်လန့်နေကြသည်။ မော်ကွန်း Class များအကြောင်း ထုတ်ဖော်ပြောကြားတုန်းကထက် ပိုမိုအဖြစ်သည်းနေကြ၏။ S.A ဂရုကပင် အခြေအနေမှာ သိပ်မကောင်းတော့ဟု သတ်မှတ်လိုက်ပြီး အာရုံကို တခြားနေရာသို့ ပြောင်းရတော့သည်။ မစ်ရှင်များကို အသက်သွင်းလိုက်ရ၏၊။ 

“အခုချက်ချင်း ပြိုင်ပွဲမစ်ရှင်တွေကို လုပ်လိုက်ကြ။ လူတွေရဲ့ အာရုံကို အက်ဘက်ရောက်ပစေ” လင်ချန်းဟို အမိန့်ပေးလိုက်သည်။

ထိုအချိန် Satisfy ရှိ ကစားသမားများအားလုံးရှေ့တွင် အသိပေးစာများ ပေါ်လာသည်။

[လက်တွေ့ကမ္ဘာ၏ အချိန်ဖြင့် နှစ်လကြာသောအခါ နိုင်ငံအသီးသီးကို ဂုဏ်ပြုသောအားဖြင့် နိုင်ငံပြိုင်ပွဲကို ကျင်းပပါတော့မည်။ ယှဉ်ပြိုင်သူများကို ခေါ်ယူမည်။ ဂိမ်းထဲရှိ မစ်ရှင်များဖြင့် သင့်ကိုယ်သင် တိုးတက်အောင် လုပ်ထားပါ] 

မီဒီယာများ၏ အာရုံ ပြောင်းသွားကြသည်။

[ဂိမ်းမှာ မစ်ရှင်အမျိုးမျိုးပေါ်လာတယ်တဲ့။ မစ်ရှင်တိုင်းအတွက် အထူးဆုတွေ ရှိကြတယ်လို့ ထင်လား]

[S.A. ဂရုကိုယ်တိုင် တောင်ကိုရီးယားမှာ ပြိုင်ပွဲဦးဆောင်လုပ်ပေးမှာတဲ့] 

[နိုင်ငံပြိုင်ပွဲမှာ ဘော့စ်ရိတ်ဒ်၊ PvP၊ အိမ်မွေးသားရဲမာရသွန်၊ ဝင်္ကပါဖြတ်ကျော်ခြင်း၊ ထုတ်လုပ်ရေးပြိုင်ပွဲတွေလိုမျိုး ပွဲတွေ ပါတယ်တဲ့....]

[ဥက္ကဌလင်ချန်းဟို ‘မင်းသာ ပြိုင်ပွဲဝင်အဖြစ် ရွေးချယ်ခံရရင် ဆုလာဘ်အများကြီးက မင်းကို စောင့်မျှော်နေပါလိမ့်မယ်’]

[(Column) ပထမဆုံးဒဏ္ဍာရီ Class ပက်မာ၏ ဆက်ခံသူ။ သူလဲ ပြိုင်ပွဲမှာ ဝင်ပြိုင်မှာလား]

[ပက်မာရဲ့ ဆက်ခံသူက ဘယ်နိုင်ငံကလဲ]

[ဘယ်နိုင်ငံကဘဲဖြစ်ဖြစ် အက်နိုင်ငံကတော့ ပြိုင်ပွဲမှာ ချန်ပီယံဖြစ်ပြီ]

အဆုံးတွင် လူထုနှင့် မီဒီယာများက ပက်မာ၏ ဆက်ခံသူအပေါ် အာရုံရောက်လာကြပြန်သည်။

ခမ်၏ ပန်းပဲဖိုတွင်...

ကမ္ဘာကြီးက မည်သို့ဖြစ်စေကာမူ ဂရစ်ခ်ကတော့ သူ့အလုပ်ကိုသာ လုပ်နေသည်။ ဂျီရှုက၏ တောင်းဆိုမှုကြောင့်လည်း ပါပါသည်။

“ရာတန်ကျောင်းတော်နဲ့ စစ်ပွဲဖြစ်ဖို့ အလားအလာအတော်များနေပြီ။ ငါတို့ နင့်ရဲ့ အရည်အချင်းကို လိုတယ်။ တစ်လအတွင်း အစည်းအရုံးအဖွဲ့သားတွေအတွက် အိုင်တမ်တွေ လုပ်ပေးလို့ ရမလား”

“တစ်လလား။ ဒါဆို ပြိုင်ပွဲကို ဝင်ပြိုင်ဖို့ မစ်ရှင်လုပ်ဖို့ကော... အချိန်မရှိတော့ဘူးလေ”

“အိုမို။ နင်က ပြိုင်ပွဲမှာ ဝင်ပြိုင်ဖို့ လုပ်နေတာလား။ နင် ဝင်ပြိုင်လိုက်ရင် နင့်သရုပ်မှန်ပေါ်သွားမှာကို မကြောက်ဘူးပေါ့။ ပက်...မာ... ရဲ့... ဆက်.. ခံ... သူ... ကြီး.. ရေ...”

“ဟာ..... အရမ်းစိတ်ပျက်ဖို့ ကောင်းတာဘဲ”

အလွန်စိုးရိမ်နေသူမှာ ဗန်တာဖြစ်သည်။

“ဂရစ်ခ်... ငါ့ချပ်ဝတ်လေး...”

[လှိုင်းချပ်ဝတ်ကို မည်သို့ပြုလုပ်ရမည်ကို သင်ယူလိုက်ပါသည်။]

[လှိုင်းချပ်ဝတ်]

အဆင့်သတ်မှတ်ချက် : ရှားပါး ~ ဒဏ္ဍာရီ

ရှားပါးအဆင့်သတ်မှတ်ချက်၏ အချက်အလက်:

အကြမ်းခံမှု : 420/420   ခုခံမှု : 531   လှုပ်ရှားနှုန်း : -8%

* သင့်အသက်ပွိုင့် 90% အထက်တွင် ရှိနေပါက ထိခိုက်မှုရရှိနှုန်း 40% လျှော့ချပေးသွားပါမည်။

* ဖြတ်တောက်သည့် တိုက်ခိုက်မှုများကို တန်ပြန်ခုခံနိုင်မှု 15% တိုးလာသည်။

မော်ကွန်းအဆင့်သတ်မှတ်ချက်၏ အချက်အလက်:

အကြမ်းခံမှု : 455/455   ခုခံမှု : 575   လှုပ်ရှားနှုန်း : -7%

* သင့်အသက်ပွိုင့် 80% အထက်တွင် ရှိနေပါက ထိခိုက်မှုရရှိနှုန်း 45% လျှော့ချပေးသွားပါမည်။

* ဖြတ်တောက်သည့် တိုက်ခိုက်မှုများကို တန်ပြန်ခုခံနိုင်မှု 20% တိုးလာသည်။

* ဖြတ်တောက်သည့် တိုက်ခိုက်မှုကို ချေဖျက်ရန် သေးငယ်သော အခွင့်အလမ်းရှိသည်။

ပြိုင်ဘက်ကင်းအဆင့်သတ်မှတ်ချက်၏ အချက်အလက်:

အကြမ်းခံမှု : 493/493   ခုခံမှု : 631   လှုပ်ရှားနှုန်း : -6%

* သင့်အသက်ပွိုင့် 70% အထက်တွင် ရှိနေပါက ထိခိုက်မှုရရှိနှုန်း 50% လျှော့ချပေးသွားပါမည်။

* ဖြတ်တောက်သည့် တိုက်ခိုက်မှုများကို တန်ပြန်ခုခံနိုင်မှု 25% တိုးလာသည်။

* ဖြတ်တောက်သည့် တိုက်ခိုက်မှုကို ချေဖျက်ရန် သေချာသော အခွင့်အလမ်းရှိသည်။

ဒဏ္ဍာရီအဆင့်သတ်မှတ်ချက်၏ အချက်အလက်:

အကြမ်းခံမှု : 574/574   ခုခံမှု : 694   လှုပ်ရှားနှုန်း : -4%

* သင့်အသက်ပွိုင့် 60% အထက်တွင် ရှိနေပါက ထိခိုက်မှုရရှိနှုန်း 60% လျှော့ချပေးသွားပါမည်။

* ဖြတ်တောက်သည့် တိုက်ခိုက်မှုများကို တန်ပြန်ခုခံနိုင်မှု 30% တိုးလာသည်။

* ဖြတ်တောက်သည့် တိုက်ခိုက်မှုကို ချေဖျက်ရန် မြင့်မားသော အခွင့်အလမ်းရှိသည်။

သံနက်ဖြင့် ပြုလုပ်ထားသည့် ချပ်ဝတ်ဖြစ်သောကြောင့် စတီးထက် အဆပေါင်းများစွာ ပေါ့ပါးကာ ပိုမိုခိုင်ခံ့ပါသည်။

ချပ်ဝတ်ပေါ်တွင် လှိုင်းပုံစံရှိသဖြင့် ရန်သူ၏ တိုက်ခိုက်မှုကို ရှောင်လွှဲ၍ ရသည်။

အသုံးပြုသူကန့်သတ်ချက် : အဆင့် 240 နှင့်အထက်။ ခွန်အား 500 အထက်။ တန်းမြင့်လေးလံသောချပ်ဝတ်ကျွမ်းကျင်မှုအဆင့် ၂ နှင့်အထက်။

အလေးချိန် : 1,920

“ဟုတ်ပါပြီ။ ငါ သိပြီ။ ငါ သိပါပြီ”

ဂရစ်ခ် နောက်ဆုံးတော့ သူ့တာဝန်များကို ယူရတော့သည်။ ပန်းပဲဖိုထဲတွင် ပိတ်မိနေသော်လည်း စိတ်ပျက်ခြင်းမဖြစ်မိပေ။

‘ဘာပဲဖြစ်ဖြစ် ငါကသာ အတော်ဆုံးပါလေ’

အခြားအဆင့်ရှိကစားသမားများနှင့် မတူသည်က သူက အပြေးအလွှားလုပ်ကာ သဲကြီးမဲကြီး အမဲလိုက်နေရန် မလိုချေ။ လောလောဆယ် အိုင်တမ်လုပ်ပြီး ပိုက်ဆံရှာဖို့ အာရုံစိုက်ရမည်။ ဂရစ်ခ်၏ စိတ်သည် ကိုယ်ခံပညာရှင်တစ်ယောက်ကဲ့သို့ ငြိမ်သက်နေကာ တိတ်ဆိတ်နေ၏။

ထိုအချိန် ရှင်းယောင်ဝူးအိမ်ရှေ့သို့ ဇိမ်ခံကားအရှည်ကြီးတစ်ခု ရောက်လာသည်။ ထိုကားပိုင်ရှင်ဖြစ်သူမှာ ရှင်းယောင်ဝူး ကောင်းကောင်းသိသော သူ ဖြစ်ပါသည်။