Villain - Chapter 2

 ဗီလိန်ပေပေ မင်းသမီးတွေက ငါ့ဘက်မှာ

အခန်း(၂) ပထမဆုံး သရုပ်ဆောင်ခြင်း စတင်ပြီ

 “ သခင်လေးစု။ကုမ္ပဏီကို ရောက်ပါပြီ။ ”

“ အင်း ”

စုမင်ယွမ်က အေးစက်စက်နှင့် ဖြေလိုက်သည်။အခြားတစ်ဖက်တွင် သူ၏သက်တော်စောင့်သည် ကားမှအရင်ထွက်ပြီး သူ့အတွက် ကားတံခါး ဖွင့်ပေးသည်။

ထိုအထပ်မြင့် အဆောက်အအုံကြီးရှေ့တွင် ဖော်ပြထားသည်မှာ သူ၏ကုမ္ပဏီနာမည်ဖြစ်သော “ မင်ယွမ် ဖျော်ဖြေရေး ကုမ္ပဏီ ” ပင် ဖြစ်သည်။

ထိုအဆောက်အအုံကို စုမင်ယွမ် ပိုင်ဆိုင်သည်။

မင်မြို့ရှိ မြေကွက်ဈေးနှုန်းများမှာ ခေါင်ခိုက်နေသော်လည်း စုမိသားစု၏ တစ်ဦးတည်းသောသား ဖြစ်သည့်အလျောက် သူသည် ကိုယ်ပိုင်ကုမ္ပဏီ တည်ထောင်ရန်အတွက် မည်သည့်အတွက်ကြောင့် အခြားတစ်ယောက်၏မြေကွက်ကို ငှားရမ်းရမည်နည်း။ 

ငှားရမယ့်အစား ဝယ်ပဲဝယ်လိုက်မှာပေါ့။ 

ကုမ္ပဏီသို့ ဝင်သည့်အခါ သက်တော်စောင့် နှစ်ယောက်သည် သူ့ကို ဝိုင်းရံထားကြသည်။ဝန်ထမ်းများကလည်း သူ့ကို ခေါင်းငုံ့ပြီး အရိုအသေပေးကာ လေးစားသမှုပြုကြသည်။

ထိုကုမ္ပဏီရှိ ဝန်ထမ်းအများစုမှာ အမျိုးသမီးများ ဖြစ်ကြသည်။သာမန်အမျိုးသမီးများမဟုတ်။လှပသော အမျိုးသမီးများ ဖြစ်လေသည်။

စုမင်ယွမ်သည် မိန်းမလှများကို သဘောကျသည့်အတွက် သူ၏ကုမ္ပဏီတွင်လည်း မိန်းမလှများ ရှိနေရမည်မှာ အသေအချာပင် ဖြစ်သည်။

ဤကုမ္ပဏီ၏ အလုပ်ခန့်အပ်ခြင်း၌ ကျွမ်းကျင်မှုသည် အရေးကြီးဆုံး မဟုတ်ပေ။အပြင်ပိုင်းပုံစံသာ အရေးကြီးသည်။

ကံမကောင်းစွာပင် အစ်မဖြစ်သူ စုရွှယ်လန်က စုမင်ယွမ်၏ လွန်ကဲသော အပြုအမူများကို သည်းမခံနိုင်သည့်အတွက် ဝင်ရောက်စွက်ဖက်ခဲ့သည်။စုရွှယ်လန်သည် ကျွမ်းကျင်ဝန်ထမ်းတစ်ဖွဲ့ကို ဤနေရာ၌ အလုပ်ခန့်ပြီး စုမင်ယွမ်အား ပုံမှန်စောင့်ကြည့်စေကာ ကုမ္ပဏီ၌ ပြဿနာမရှာရန် တားဆီးခဲ့သည်။

ဤကုမ္ပဏီသည် စုမင်ယွမ်၏ မောင်းမဆောင်(ဟာရမ်) အနေဖြင့်သာ တည်‌ရှိနေခြင်းဖြစ်သည်။

မည်သို့ပင်ဆိုစေကာမူ စုမင်ယွမ်သည် ဘာမှမသိ ဘာမှမတတ်ဘဲ ဖခင်ဖြစ်သူကို အမြဲ‌တစေ စိတ်ပျက်စေခဲ့သူတစ်ယောက်ဖြစ်သည်။အစ်မဖြစ်သူ စုရွှယ်လန်က မိသားစုကုမ္ပဏီနှင့် အခြားကိစ္စများကို တာဝန်ယူထားရသည်။

အကယ်၍ စုမင်ယွမ်က စုရွှယ်လန်ကို အာခံမိခဲ့လျှင် စုရွှယ်လန်သည် သူ၏လုပ်ရပ်များကို ဖခင်ဖြစ်သူထံ ပြောပြရုံသာမက ကုမ္ပဏီတည်ထောင်ရခြင်း၏ ရည်ရွယ်ချက်ဖြစ်သော မိန်းမလိုက်ရန်ကိုပါ ထုတ်ဖော်မည်ဖြစ်သည်။အိမ်ပြန်ရောက်သည်နှင့် စုမိသားစု၏ သခင်ဖြစ်သူ စုမင်ယွမ်သည် သေချာပေါက် အရိုက်ခံရမည်ဖြစ်ပြီး ဘဏ္ဍာရေးအရင်းအမြစ်လည်း အသိမ်းခံရမည်ဖြစ်သည်။

ထို့ကြောင့် စုမင်ယွမ်သည် သတိထားပြီး ရံဖန်ရံခါ၌သာ လှုပ်ရှားသည်။သူသည် ကုမ္ပဏီထဲရှိ အမျိုးသမီး ဝန်ထမ်းများ၌ စနောက်၍သာ ရလေသည်။နေ့ခင်းပိုင်း၌ သူသည် တဏှာစိတ်ကြီးမားသော လုပ်ရပ်များကို မလုပ်ရဲပေ။

“ သခင်လေးစု။အစည်းအဝေးခန်းမက လူတွေအားလုံး သခင်လေးရဲ့ ညွှန်းကြားချက်ကို စောင့်နေကြပါတယ်။ ”

ကုမ္ပဏီ၏ အထွေထွေ မန်နေဂျာသည် လွန်လွန်ကဲကဲ ပြုံးရင်း ရောက်လာသည်။

ထိုသူသည် ရုပ်ရည်သာမန်သာရှိသော သက်လတ်ပိုင်း အမျိုးသမီးတစ်ယောက်ဖြစ်ပြီး စီမံခန်းခွဲရေးကျွမ်းကျင်ရုံသာမက စုမင်ယွမ်၏ မျှော်လင့်ချက်နှင့်လည်း လိုက်လျောညီထွေ ဆောင်ရွက်နိုင်စွမ်းရှိသည်။အစည်းအဝေးခန်းမသို့ စုမင်ယွမ်သွားတိုင်း စုမင်ယွမ်ကို ချောမောလှပသော အတွင်းရေးမှူးတစ်ယောက်က အဖော်ပြုပြီး လက်ဖက်ရည်နွေးနွေး ပြင်ပေးရသည်။

စုရွှယ်လန်၏ အသိပေးမှုကို စဉ်းစားသည့်အနေဖြင့် စုမင်ယွမ်သည် ထိုကဲ့သို့ ထင်းထင်းရှားရှားဖြစ်သော ရာထူး၌ ပန်းအိုတစ်လုံး ထားခြင်းကို ရှောင်ရှားမည်ဖြစ်သည်။

ထို သက်လတ်ပိုင်းအမျိုးသမီး စုမိန်အား စုရွှယ်လန်ကို ဖြေရှင်းရန်အတွက် အထူးတလည် ရွေးချယ်ထားခြင်းဖြစ်သည်။စုမိန်သည် လူတစ်ယောက်၏ စရိုက်ကို အကဲဖြတ်ရာ၌ စုမင်ယွမ် ကျေနပ်သည်အထိ အတော်လေး ကျွမ်းကျင်သည်။

အဆောက်အအုံထဲသို့ စုမင်ယွမ် ဝင်လာသည့်အခါ စုမိန်သည် စုမင်ယွမ်အား ဆွဲဆောင်မှုရှိပြီး သွယ်လျသော မိန်းကလေး တစ်ယောက်နှင့် မိတ်ဆက်ပေးသည်။

“ သခင်လေး စု။ဒါက ရှောင်လောလောပါ။ကျွန်မတို့ရဲ့ ဝန်ထမ်းအသစ်ပေါ့။အတွင်းရေးမှူးလုပ်မှာ။လောလော။ဥက္ကဋ္ဌ စု ကို နှုတ်ဆက်လိုက်ပါဦး။ ”

“ မင်္ဂလာပါ။ဥက္ကဋ္ဌ စု။ ”

ရှောင်လောလောက စုမင်ယွမ်အား ကြောက်ကြောက်လန့်လန့်နှင့် နှုတ်ဆက်လိုက်သည်။

ရှောင်လောလောကိုကြည့်ရင်း စုမင်ယွမ်၏မျက်လုံးများ ရုတ်တရက် ကျဉ်းမြောင်းသွားသည်။

တစ်ချိန်တည်းမှာပင် စနစ်မှစာတိုပေးပို့မှုကို သူကြားလိုက်ရသည်။

[ တွီ။ဇာတ်ကွက် စတင်ပါပြီ။လက်ခံသူက ဝတ္ထုရဲ့ ဇာတ်ညွှန်းနဲ့ ဇာတ်ကောင်ဖွံ့ဖြိုးမှုတွေအတိုင်း သရုပ်ဆောင်ရပါမယ်။ ]

[ သရုပ်ဆောင်မှုနဲ့ ရလာဒ်ပေါ်မူတည်ပြီးတော့ ခွန်အားတိုးမှတ်နဲ့ ဗီလိန်မှတ်တွေကို ၁၀၀ကနေ ၁၀၀၀ အတွင်း ရရှိပါမယ်။ ]

ဒါက အရမ်းမိုက်တာပဲ။ 

နောက်ဆုံးဆော့ ဇာတ်ကွက်စပြီပဲ။ဗီလိန်အမှတ်တွေ ရှာရမယ့် အချိန်ရောက်ပြီ။ 

ယခင်ဘဝ၌ ပထမဆုံးအနေဖြင့် ဗီလိန်အဖြစ် သရုပ်ဆောင်ခဲ့ခြင်း ဖြစ်သောကြောင့် မကျွမ်းကျင်ခဲ့ပေ။ထို့ကြောင့် ထိုဇာတ်ကွက်အတွက် စုမင်ယွမ်သည် ဗီလိန်အမှတ်၃၀၀သာ ရရှိခဲ့သည်။

အခုငါ့ရဲ့ သရုပ်ဆောင်စွမ်းရည်နဲ့ဆို အမှတ်၁၀၀၀ အပြည့်မရရင်တော့ အနည်းဆုံး ၉၀၀လောက် အလွယ်လေး ရနိုင်တာပဲ မဟုတ်လား။ 

စုမင်ယွမ်သည် ယုံကြည်ချက်များ ပြည့်နှက်နေခဲ့၏။

ခွန်အားတိုးမှတ်များအတွက် စုမင်ယွမ်သည် ခန္ဓာကိုယ် ကြံ့ခိုင်မှုကို တိုးမြင့်ရန် သုံးမည်ဖြစ်ပြီး ရတနာနှင့်အစွမ်းများအတွက် လဲလှယ်ကာ ပို၍သန်မာလာအောင် ပြုလုပ်နိုင်လေသည်။

ခွန်အားတိုးမှတ်များသည် ဇာတ်ကွက်သရုပ်ဆောင်မှု တစ်ခုချင်းမှ ပေးအပ်သော ဗီလိန်အမှတ်ပေါ် အခြေခံ၍ ရရှိခြင်းဖြစ်သည်။

မည်သို့ပင်ဆိုစေကာမူ စုမင်ယွမ်သည် ဇာတ်လိုက် ရှောင်ရန်း၏ ရိုက်နှက်မှုကို အကြိမ်ကြိမ်ခံရပြီး လုပ်ကြံခံရသည်အထိ ခံရနိင်သည်။ဝတ္ထုအစပိုင်းနှင့် အလယ်ပိုင်း၏ အဓိကဗီလိန်တစ်ယောက် ဖြစ်သည့်အလျောက် စနစ်သည် သူ့အား ဝတ္ထု၏အဆုံးသတ် မတိုင်မီ မသေစေချင်ပေ။

ယခင်ဘဝကဲ့သို့ပင် စုမင်ယွမ်သည် ခွန်အားကို အဆုံးစွန်အထိ တွန်းပို့ချင်သည်။ဘယ်လိုပဲဖြစ်ဖြစ်ပါ။အစွမ်းထက်တဲ့ခန္ဓာကိုယ်ကို မလိုချင်တာ ဘယ်သူရှိလို့လဲ။ 

စုမင်ယွမ်သည် ဇာတ်လိုက်၏အရိုက်ခံရမည့် ဗီလိန်တစ်ယောက် ဖြစ်ရမည်မဟုတ်ခဲ့လျှင် သူ့ကို ရှောင်ရန်းပင် အနိုင်ယူနိုင်မည် မဟုတ်ပေ။

ထို့ပြင် သူသည် စိတ်ဝင်စားမှုများအရ စစ်တုရင်ကျွမ်းကျင်မှု၊ဆေးပညာကျွမ်းကျင်မှု၊လက်ရေးလှမာစတာ၊ စန္ဒယားမာစတာ  အစရှိသည့် အစွမ်းများကိုလည်း ရရှိခဲ့သည်။

သို့သော်လည်း ထိုအစွမ်းများသည် စိတ်အပန်းဖြေရန်အတွက်သာ အသုံးပြု၍ရပြီး အခြားသူများကို ပြသ၍မရပေ။

ယခုတစ်ခေါက် ပြန်လည်မွေးဖွာလာသည့်အချိန်တွင် သူ၏အစွမ်းသည် ယခင်ကကဲ့သို့ မဟုတ်တော့သော်လည်း ရရှိခဲ့သော မာစတာအဆင့် အစွမ်းများသည် သူနှင့်အတူ ကျန်ရှိနေသေးကြောင်း စုမင်ယွမ် ခံစားမိလိုက်သည်။

တစ်ဖက်တွင်လည်း သူစိုးရိမ်နေသည့်အရာ ရှိသည်။သူသည် ရုပ်ပိုင်းဆိုင်ရာခွန်အား တိုးမြှင့်ရန်အတွက် ခွန်အားတိုးအစွမ်းအများအပြားကို ယခုချက်ချင်းရရှိရန် လိုအပ်နေသည်။ဂီတ၊လက်ရေးလှ၊ဆေးဝါး၊စစ်တုရင် စသည်တို့ကို သူသဘောမကျပေ။အကြောင်းရင်းမှာ မာစတာအဆင့်၌ ၎င်းတို့အား ဝယ်ယူ၍ရခြင်းကြောင့်ပင် ဖြစ်သည်။

စုမင်ယွမ်သည် ကမ္ဘာမြေသို့ အမြန်ပြန်နိုင်ရန်အတွက် ဗီလိန်အမှတ် လုံလုံလောက်လောက် ရရှိရေးကိုသာ ဂရုစိုက်သည်။

“ သခင်လေးစု။သခင်လေးစု။ ”

ရှောင်လောလောကိုမြင်ပြီးနောက် စုမင်ယွမ် ကြက်သေသေသွားကြောင်း တွေ့လိုက်သည့်အခါ စုမိန် စိတ်ထဲ၌ ပျော်သွားပြီး ထိုမိန်းကလေးအား ဤနေရာသို့ ခေါ်လသည်မှာ ဆုံးဖြတ်ချက် မှန်ကန်ကြောင်း သိသွားသည်။

မည်သို့ပင်ဆိုစေကာမူ အစည်းအဝေးခန်းထဲ၌ စုမင်ယွမ်ကို စောင့်နေသော အရေးကြီးပုဂ္ဂိုလ်တစ်ယောက် ရှိနေလေသည်။

စုမိန်က စုမင်ယွမ်အား အသံတိုးတိုးဖြင့် နှစ်ခေါက်ခေါ်လိုက်သည်။

စုမင်ယွမ် သတိပြန်ဝင်လာသည်။သူသည် စိတ်မရှည်စွာပင် လက်ဝှေ့ရမ်းပြီး ပြောလိုက်သည်။

“ အစည်းအဝေးကို ကျုပ်မတက်တော့ဘူး။ကျုပ် ဒီကိုလာတာက ခင်ဗျားအတွက် တာဝန်တွေ စီစဉ်ပေးဖို့ပဲ။ ”

“ လျှိုမုန့်နင်ရဲ့ ထွက်လာတော့မယ့်ရုပ်ရှင် “ ပြိုင်ဘက်ကင်းမိန်းမလှ ”က ထုတ်လုပ်ရေးအထိ ရောက်နေပြီမဟုတ်လား။ကျုပ်တို့ကုမ္ပဏီကလည်း သူ့ရဲ့ရုပ်ရှင်အသစ်မှာ ရင်းနှီးမြှုပ်နှံသူတစ်ယောက် ဖြစ်ချင်တယ်။နောက်ကျရင် ခင်ဗျား သူတို့ကို အသိပေးလိုက်။ ”

“ အတွင်းရေးမှူးရှောင်ကို ကျုပ်ရုံးခန်းဆီ အရင်ခေါ်သွားခိုင်းလိုက်ဦးမယ်။ကုမ္ပဏီရဲ့ လက်ရှိပြဿ‌နာတွေကို သူ့နှုတ်ခမ်းကနေ ကျုပ် ရှင်းရှင်းလင်းလင်း သိချင်တယ်။ ”

ထိုသို့ပြောလိုက်သည့်အခါ၌ စုမင်ယွမ်၏အပြုံးနှင့် လေသံသည် ရှောင်လောလော၏ နှုတ်ခမ်းမှတစ်ဆင့် ကုမ္ပဏီကိစ္စများကို သိချင်ပုံမရဘဲ ထိုလက်ရောမြောက်သော နှုတ်ခမ်းများမှ အခြားကိစ္စများကို သိချင်နေပုံရသည်။

ထိုစကားနောက်ကွယ်မှ အဓိပ္ပာယ်ကို စုမိန်သဘောပေါက်လိုက်ပြီး သိုသိုသိပ်သိပ် ထွက်သွားသည်။

စုမင်ယွမ်သည် အစည်းအဝေးခန်းဆီသို့ စီနီယာ ကော်ပိုရိတ်

အမှုဆောင်တစ်ဖွဲ့ကို စောစောသွားခိုင်းပြီး သူ့ကို စောင့်နေရန် အမိန့်ပေးခဲ့သည်။သို့သော်လည်း သူမပေါ်လာခဲ့ပေ။

ဒါက ငါ့စတိုင်ပဲ။ဒီလိုအခြေအနေတွေကို ကိုင်တွယ်နိုင်အောင်လို့ သူတို့ကိုငါ ပိုက်ဆံလုံလုံလောက်လောက် ပေးထားတယ်။ 

“ အတွင်းရေးမှူးရှောင်။ရှောင်လောလောဟုတ်။မင်းကို လောလော လို့ပဲခေါ်မယ်။မင်း ရှေ့ကနေသွား။ ”

“… ဟုတ်ကဲ့ပါ။ဥက္ကဋ္ဌ စု။ ”

ရှောင်လောလောက ကြောက်ကြောက်ရွံ့ရွံ့နှင့် ခေါင်းညိတ်လိုက်သည်။

စုမင်ယွမ်သည် ရှောင်လောလော၏ လှပသော ကောက်ကြောင်းများနှင့် လမ်းလျှောက်နေသည့်အမူအရာကို အရိုအသေမဲ့သော မျက်လုံးများဖြင့်ကြည့်နေပြီး ရှောင်လောလောသည် ရှေ့မှနေ၍ မသက်မသာနှင့်သွားလိုက်သည်။

မည်သည်မျှ လုပ်နိုင်သည့်အရာ မရှိပေ။စုမင်ယွမ်သည် ယခင်ဘဝက လူကြီးလူကောင်းတစ်ယောက်ဖြစ်ခဲ့သည်။သူသည် မိန်းမလှများအား လေးစားပြီး သိမ်မွေ့သော မျက်လုံးများဖြင့်သာ ကြည့်လေ့ရှိသည်။

သို့သော်လည်း ဗီလိန်တစ်ယောက်ဖြစ်သည့်အတွက် သူသည် ရှောင်လောလောအား အင်္ကျီဆွဲဖြဲချင်နေသည့် အတားအဆီးမရှိ ရဲတင်းယုတ်မာလှသောအကြည့်ဖြင့် စိုက်ကြည့်နေသည်။

စုမင်ယွမ်လည်း ထိုကဲ့သို့ မလုပ်ချင်ပေ။ 

ထိုအကြည့်ကို ရှောင်လောလော ရိပ်မိသွားပုံရပြီး နားရွက်များ အနည်းငယ် နီမြန်းသွား၏။

ရှောင်လောလောသည် ရုံးခန်းထဲသို့ ဝင်လာနေရင်း ညာဘက်ဖြင့် အင်္ကျီအစွန်းအား တင်းတင်းကျပ်ကျပ် ဆုပ်ကိုင်ထားသည်ကို စုမင်ယွမ် သတိထားမိခဲ့သည်။ရှောင်လောလော ကြောက်လန့်နေသည်မှာ အသေအချာပင် ဖြစ်သည်။

စိတ်မကောင်းပါဘူး။ဒါပေမဲ့လည်း င့ါရဲ့ဗီလိန်အမှတ်အတွက် ငါဆက်လုပ်မယ့် အကျိုးဆက်ကို မင်းခံစားရမှာပဲ။

ဒါပေမဲ့ ဒါတွေအားလုံးက ဒီဝတ္ထုရဲ့ အဲ့ဒီစောက်စာရေးဆရာကြောင့်ပဲ။သူဒီလို ဇာတ်ကွက်မျိုးရေးခဲ့လို့ ရှောင်လောလောက ဒီလောကမှာ ဒီလိုခံစားဖို့ ကံပါလာခဲ့တာ။ 

အစောင့်နှစ်ယောက် ရောက်ရှိလာပြီး တစ်ယောက်ယောက် မနှောင့်ယှက်စေရန် သို့မဟုတ် ခိုးမနားထောင်ရန်အတွက် ရုံးခန်းတံခါးအနီးတွင် မတ်တပ်ရပ်နေလိုက်ကြသည်။

တံခါးကို ပိတ်လိုက်ပြီဖြစ်သော စုမင်ယွမ်သည် ကုလားထိုင်ပေါ်တွင် ထိုင်နေရင်း အလွန်အမင်း ကြောက်လန့်ပြီး မသက်မသာ ခံစားနေရသော ရှောင်လောလောကို အမိန့်ပေးသည်။

“ ဒီကိုလာ‌ခဲ့။ ”